O' Gabi

03 August 2009

O Gabi, ikaw na s'yang kumot ng dilim,

Yakap ng lamig,

at balot ng tahimik.

Itago mo ako

Sa iyong mga bisig,

Yakapin sa iyong dib-dib

Nang ako'y hindi na matakot.

O Gabi, ang puso ko'y humihiram,

Sa kapa mong itim

ng kaunting pagtago

Sa puso kong duwag

na may matapang na pag-ibig.

O Gabi, lunurin mo siya

Sa apoy ng aking payapa

at di mapaslang na pagkahimbing

sa kanyang ganda.

Na umaagaw ng liwanag sa iyong mga tala.

O Gabi, ikaw na sumumpa

Sa kaluluwa kong hilaw

Na mapain sa karagatan

ng mabangis na pag-ibig

Gabi-gabi'y nabibingwit,

at sa iyong pamamahinga,

muling pinawawalan,

para lamang madagit ulit,

sa iyong pagbabalik.

O Gabi, sakit man ito o lunas

pangako ko sa iyong iiwan,

Hindi hihimbing akong iyong isinilang

Hangga't ikaw ang Dumadatu sa Kalangitan.