Listahan

28 December 2010

1.

Lista ng mga bagay na malalamig: bagyo, beer, bentilador, boses ni Armi, bote, bughaw, hangin, kama, kanin, kwarto, pasko, puso, sigarilyo, sorbetes, ulam, ulan, unan.

2.

Nagbabasa ako ng libro mula sa ibabaw ng balikat ng katabi ko sa bus, ang libro ay may kwento tungkol sa pag-ibig. Ako rin.

3.

Sabihin na nating ang mga bote ng beer na gumugulong sa sahig ng kwarto ko ay marka na ako ay mag-aalaga ng pusa sa mga susunod na araw. 

4.

Ang mga isda sa palengke ay laging nasa palengke, ang isda sa dagat ay hindi mas masarap kainin pero may kasamang paghihirap ng paghuli. Ang isda sa palengke na pinalaki pa sa palaisdaan ay nakakatamad na isda.

5.

Mga Kailangan ko na nagsisimula sa Pa-: Palabas, Palaso, Pandesal, Panulat, Papel, Parabula, Parachute

6.

Karatula sa Hong Kong:

"No Smoking I Will Crazy"

7.

Kapag ang buwan ng sintu-sintong pagsasaya ay naging buwan ng pagkahulog ng himpapawid patungo sa akin, magugunaw na ang mundo.

8.

Takot ako sa dilim.

9.

Sa mga pagkakataong hindi ka matulungan ni John Lloyd, o ni John Cusack, o ni John Mayer. Mabuti pang kumunsulta kay Johnny Walker.

10.

Listahan ng laman ng entri na ito: Isang lista ng mga bagay na malalamig, isang inimbentong kwento, isang propesiya, isang isda, isang listahan na may nawawala, isang karatulang hindi sinusunod, isang sintu-sintong propesiya, isang katotohanan, isang payong pang kaibigan, isang listahan ng laman ng entri na ito.