Mahilig Ako sa Gabi

13 November 2008

Mahilig ako sa gabi, walang context, ako lang ba ang nakaisip ng context? Basta, gusto ko talaga ang gabi, yung dilim, yung bilog na bilog na buwan, tulad ngayon, yung madilim, yung mga ulap, yung mga poste ng ilaw, lalo na kung mahina yung ilaw, tapos yung lumang bumbilya na dilaw yung ilaw, ang galing, nakakaiyak sa ganda.

Madami akong ala-ala sa gabi, andun yung nagsesenti ako sa kwarto nung bata pa ako habang naghihintay na may dumaang witch sa ilaw ng buwan sa bintana namin, yung bintana na sliding, yung kahoy na may squares na mother-of-pearl. Galing.

Naalala ko nung hayskul, kapag tumetengga ako sa kwarto ko ng gabi, kahit pinapapak na ako ng lamok e iiwan ko pa rin bukas ang bintana para makita ko ang buwan at mahanginan ako ng hangin ng gabi. Masarap magsulat, kahit wala ako masyado nasusulat pag gabi, at puro tulang eng-eng ang gawa ko no'n. Masarap mag-isip, magplano ng future, ngayon kasi hanggang bukas na lang ang future na napaplano ko.

Naalala ko din nung nagsusulat ako ng tula nung hayskul sa sementeryo, malawak na damuhang sementeryo, gabi nun at undas, yun yata ang una kong sunken garden moment, basta, iba ang epekto n'ya sa akin.

Ngayon gusto ko talaga ang gabi sa UP, yung UP fair, yung mahaba na kulitan sa sunken pagkatapos ng Lantern Parade, yung mga tambay lang, nagkadalahang kwentuhan pagkatapos ng klase, uuwi na lubog na ang araw. Kung wala lang akong anxiety sa pagpapagabi ay ako na ang pinakamasayang tao sa buong mundo tuwing ginagabi ako sa UP.

Isama mo na yung usok ng sigarilyo, yung pagtengga na walang pakialam, yung happy-go-lucky ko na moda, yung pagkalimot sa madaming bagay at madaming maling desisyon na nagdala ng madami kong problema.

Andun na din yung paglalakad sa Univ Ave galing sa mga concert, masaya, nakakatuwa. Paborito ko pa rin yung sa Acad oval, mas maganda tignan yung mga jeep, kotse, at poste ng ilaw, pati na din yung mangilan-ngilan na bukas na ilaw sa mga bilding. Yung gabi, yung kwentuhan na naimpluwensyahan na ng gabi, parang droga, bangag ka na sa epekto ng lahat ng elemento. Lahat ng bagay gumaganda, kahit ano, o sino, na akala mo wala nang igaganda pa, pinagaganda ng gabi.

Kaya nakaka inlab yang gabi, mahilig ako sa gabi, siguro nga mahilig din ako 'pag' gabi. Ewan ko, basta masarap sa gabi, tara, gusto ko mag pagabi. Kung mamamatay ako, gusto ko sa gabi, sa malawak na lugar na kita ko ang madaming liwanag at dinig ko ang mga ingay, pero walang nakakakita sa akin, di ako nakikitang ngumiti para mag-paalam sa pinakamamahal kong kadiliman.